أنا مبخافشى وحفضل أقول
كلمـة حــق عليها مسئـول
إن الريس راجــل طيــب
وبشعبه دايما مشغـــــول
....
مشغول انه يلم فلوسنا
بره سويسرا يحوشهالنا
وف حسابات سريه يشيلها
نفسه يأمن مستقبلنا
....
شفتوا ازاى بقى قلبه رحيم
عنده ايمان وضميره سليم
بيجوعكوا لجل تخسوا
آه ياشعب يا محتاج لرجيم
....
من جهلكوا بتقولوا بطاله
وان الاحوال مش شغّاله
دا الراجل نفسه يريحكم
هى الراحه تبقى عواله؟
....
أما حكاية المنتجعات
ليه تسموها المعتقلات؟
ليه الظن وسوء النيّه
نفسه يفسحكوا يا بهوات
....
أما الكرسى واللى اتقال
دا كلام مش محتاج لسؤال
الغلطه دى غلطتنا يا عالم
إن مجبناش كرسى تيفال
....
والله انتم ظالمين الراجل
ضيّع عمره ومين يستاهل
حتى الاكل بياكله بدالنا
طالع واكل نازل واكل
....
بعد دا كلّه........ماله الريس؟؟؟؟؟؟؟؟؟؟؟
هناك 6 تعليقات:
بجد كلمات تحفة واحلى حاجة ال....... ربنا يستر هو اللى ممكن يتمسك صاحب المدونة لوحدة ولا اللى بدخلوا معاه ههههههه
مالوش والله مالوش.هوه حد يقدر يقول حاجة.ده احنا اخر تمام
شفت بقى الافترى بتاع الناس والظلم بيفتروا لا عجبهم راحه ولا رجيم والكوسه بقت ارخص حاجه وملياالسوق وبعون الله كل اللى علقوا هنا هنصيف فى منتجع واحد
ربنا يستر
احنا ما بنقولش غير كل خير وبعدين ايه المشكلة لما نصيف في منتجع واحد حد طايل اهو منها علي حساب الحكومة وخصوصا ان المصايف بقيت غالية خاااااالص اليومين دول....
ياجماعة قلولى المصيف امتى بالظبط علشان اجهز الهدوم ههههههههههه
ماله و الله جد ماله احســـــــن من هيك شو بدكو
إرسال تعليق